ՆՈՐՈՒԹՅՈՒՆՆԵՐ
Person Image
06.06.2018

Երևանի էներգաարդյունավետության ծրագրի իրականացումը մտավ գործնական փուլ

Երևանի քաղաքապետ Տարոն Մարգարյանը Եվրոպական ներդրումային բանկի, Հայաստանում ԵՄ պատվիրակության ներկայացուցիչների, ինչպես նաև ՀՀ-ում հավատարմագրված մի շարք երկրների դեսպանների հետ միասին այցելել է քաղաքապետարանի ենթակայության համար 110 մանկապարտեզ, որն ընդգրկված է Երևանի էներգաարդյունավետության ծրագրում ներառված նախակրթարանների շարքում: Հարկ է նշել, որ Երևանի քաղաքապետարանի և Եվրոպական ներդրումային բանկի համատեղ ծրագրով նախատեսվում է քաղաքապետարանի ենթակայության հանրային շենքերում, հատկապես մանկապարտեզներում իրականացնել էներգաարդյունավետության բարձրացման, ինչպես նաև սեյսմիկ ամրացման և հիմնանորոգման աշխատանքներ: Առանձնակի կարևորելով Եվրոպական ներդրումային բանկի և Եվրամիության ֆինանսական աջակցությամբ իրականացվող ծրագրերը՝ քաղաքապետ Տարոն Մարգարյանը բարձր է գնահատել միջազգային կառույցների հետ քաղաքային տնտեսության տարբեր ոլորտներում համագործակցությունը՝ նկատելով, որ դրանք միտված են մայրաքաղաքի ենթակառուցվածքների արդիականացմանն ու զարգացմանը: 

«Ինչպես գիտեք, Եվրոպական ներդրումային բանկի վարկային միջոցներով նախատեսվել է հիմնանորոգել և ջերմամեկուսացնել հանրային շենքերը: Առաջին փուլով կհիմնանորոգվի համայնքային ենթակայության մանկապարտեզների մի մասը, ինչն առաջնահերթ է մեզ համար՝ հատկապես հաշվի առնելով, որ մատաղ սերնդի կրթման և դաստիարակման հարցում ոչ պակաս կարևոր նշանակություն ունեն նաև այն պայմանները, որոնցում ապահովվում է դա: Մասնավորապես այս ծրագրի հետ կապված ուզում եմ հատուկ ընդգծել, որ այն Հայաստանում յուրահատուկ է, քանի որ ներառում է էներգաարդյունավետության և սեյսմակայունության բաղադրիչ: Նաև նշեմ, որ Երևանի քաղաքապետարանն էլ, կարևորելով Եվրոպական ներդրումային բանկի, Արևելյան Եվրոպայի էներգաարդյունավետության և շրջակա միջավայրի հիմնադրամի և Կանաչ կլիմայի հիմնադրամի ֆինանսական աջակցությունը, հանդես է գալու այս ծրագրի համաֆինանսավորմամբ: Վստա՛հ եմ, որ ընթացիկ բոլոր ծրագրերն իրենց կարևոր ազդեցությունը կունենան մայրաքաղաքի համաչափ զարգացման և մեր համաքաղաքացիների համար հարմարավետ միջավայրի ձևավորման գործում: Նաև լիահույս եմ, որ նմանատիպ ծրագրերը կլինեն շարունակական», - նշել է Տարոն Մարգարյանը: 
ԵՄ հարևանության երկրների վարկավորման գործառույթների արևելյան բաժնի ղեկավար Լիոնել Ղապայն էլ իր հերթին շնորհակալություն հայտնելով քաղաքապետ Տարոն Մարգարյանին՝ համատեղ արդյունավետ աշխատանքի համար, նշել է, որ Երևանն իսկապես վստահելի գործընկեր է, ինչն էլ հնարավորություն է տալիս ընդլայնելու համագործակցության ուղղություններն ու ապահովելու արդեն իսկ նախաձեռնված ծրագրերի շարունակականությունը:
«Երևանի քաղաքապետարանի հետ մենք համագործակցության ծրագրեր ենք իրականացնում տարբեր ուղղություններով և ընդլայնելով գործակցության շրջանակները՝ այսօր տալիս ենք ևս մեկ կարևոր՝ Երևանի էներգաարդյունավետության ծրագրի մեկնարկը: Ծրագրի նպատակն է այնպես անել, որ Երևանում մանկապարտեզները լինեն ավելի անվտանգ, ավելի ապահով, ավելի տաք, և այդ ամենի արդյունքում մենք, իհարկե, կհասնենք էլեկտրաէներգիայի ծախսերի կրճատման: Ի դեպ, վարկային այս ծրագիրն առանձնահատուկ է նաև նրանով, որ սա առաջին ոչ սուվերեն, այսինքն առանց պետական երաշխիքի վարկն է, որը ստորագրվել է ուղիղ Երևան համայնքի հետ: Եվ դա, անշուշտ, Երևանի հանդեպ վստահության մեծ ցուցիչ է», - նշել է Լիոնել Ղապայը:
Պատասխանատուների կողմից ներկայացվել են նաև Երևանի էներգաարդյունավետության ծրագրի մանրամասները, համաձայն որի վարկային և դրամաշնորհային միջոցների հաշվին հնարավոր կլինի բարձրացնել մանկապարտեզներում սեյսմակայունությունը և էներգաարդյունավետությունը: Այդ համատեքստում Երևանի քաղաքապետարանի ենթակայության 29 մանկապարտեզներ ամբողջովին կհիմնանորոգվեն, իսկ 118 մանկապարտեզներում կիրականացվեն էներգաարդյունավետության և սեյսմակայունության տեխնիկական ուսումնասիրություններ, որոնց հիման վրա կնախաձեռնվեն էներգաարդյունավետության և սեյսմակայունության միջոցառումներ: 
Նախատեսվում է, որ ծրագրի շրջանակում իրականացված աշխատանքների արդյունքում կստեղծվի ավելի անվտանգ միջավայր մանկապարտեզների սաների, դաստիարակների և այլ աշխատակիցների համար: Կանխատեսվում է, որ այդպիսով հնարավոր կլինի խնայել տարեկան 27.800 ՄՎտ ժամ էներգիա, նվազեցնել CO2 արտանետումների տարեկան ծավալները մինչև 5,502 տոննա և զգալի կրճատել այլ ջերմոցային գազերի արտանետումները, ինչն իր հերթին կնպաստի կլիմայի փոփոխության մեղմմանը և որոշակիորեն կկրճատի էլեկտրաէներգիայի մասով Երևանի քաղաքապետարանի բյուջեի ծախսերը: 
Այնուհետ Երևանի քաղաքապետարանի և Եվրոպական ներդրումային բանկի միջև ստորագրվել է Երևանի էներգաարդյունավետության ծրագրի դրամաշնորհային համաձայնագիրը: Փաստաթուղթը ստորագրել են Երևանի քաղաքապետ Տարոն Մարգարյանը և Եվրոպական Միության հարևանության երկրների վարկավորման գործառույթների արևելյան բաժնի ղեկավար Լիոնել Ղապայը: 
Երևանի էներգաարդյունավետության ծրագրի ֆինանասական համաձայնագիրն էլ ստորագրել են Արևելյան Եվրոպայի էներգաարդյունավետության և շրջակա միջավայրի հիմնադրամի գլխավոր տնօրեն Էվա Մանիկը և Եվրոպական Միության հարևանության երկրների վարկավորման գործառույթների արևելյան բաժնի ղեկավար Լիոնել Ղապայը:
Ստորագրված համաձայնագրերով, ըստ էության, ծրագրի իրականացումը տեղափոխվել է գործնական փուլ:
Նշենք, որ ծրագրի իրականացման ընդհանուր արժեքը կազմում է 15 միլիոն եվրո, որից ԵՆԲ վարկային միջոցներից կհատկացվի 7 մլն. եվրո, Երևանի քաղաքապետարանի համաֆինանսավորումը կկազմի 2 մլն. եվրո, E5P-ի (Արևելյան Եվրոպայի էներգաարդյունավետության և շրջակա միջավայրի գործընկերության հիմնադրամ) դրամաշնորհային միջոցները կկազմեն 5 մլն. եվրո, ՄԱԿ-ի Զարգացման ծրագրի և Կանաչ կլիմայի հիմնադրամի դրամաշնորհային միջոցներն էլ՝ 1 մլն. եվրո: 
Երևանի քաղաքապետ Տարոն Մարգարյանը Եվրոպական ներդրումային բանկի, Հայաստանում ԵՄ պատվիրակության ներկայացուցիչների, ինչպես նաև ՀՀ-ում հավատարմագրված մի շարք երկրների դեսպանների հետ միասին շրջել է նաև մանկապարտեզի բակում, զրուցել խաղացող փոքրիկների հետ՝ նրանց նվիրելով գրքեր:

 

 

Person Image
07.03.2018

Երևանի հ. 114 մանկապարտեզը հիմնանորոգումից հետո իր դռներն է բացել շուրջ 350 սաների առջև

Երևանի քաղաքապետ Տարոն Մարգարյանը ՀՀ առաջին տիկին Ռիտա Սարգսյանի հետ միասին ներկա է գտնվել Երևանի հ. 114 մանկապարտեզի վերաբացման արարողությանը, որն այսուհետ կկրի «Ծիածան» անվանումը: Ավելի քան 40 տարվա պատմություն ունեցող կրթօջախը երբևէ հիմնանորոգման չէր ենթարկվել և այսօր բոլորովին նոր հարմարություններով է իր դռները բացում շուրջ 350 փոքրիկների առջև: Հիմնանորոգման գործում ներդրում ունեցած անձանց մանկապարտեզի սաներն իրենց յուրօրինակ շնորհակալությունն են հայտնել՝ երաժշտական կատարումով: Կրթօջախի հանդիսավոր բացման պատիվը վերապահվել է Երևանի քաղաքապետ Տարոն Մարգարյանին և ՀՀ առաջին տիկին Ռիտա Սարգսյանին: 

Հիմնանորոգման ծրագիրն իրականացվել է ՀՀ առաջին տիկին Ռիտա Սարգսյանի աջակցությամբ՝ «Լույս» և «Բիայնա» բարեգործական հիմնադրամների ֆինանսավորմամբ: Երևանի քաղաքապետարանի աջակցությամբ էլ անհրաժեշտ նոր գույքով են կահավորվել խմբասենյակները, խոհանոցը, դահլիճներն ու աշխատանքային մյուս սենյակները: Մանկապարտեզի բակը նույնպես բարեկարգվել և կահավորվել է ժամանակակից մանկական խաղերով: Կրթօջախն իրականացնում է նաև ներառական կրթություն, որի համար ևս մանկապարտեզում ապահովվել են համապատասխան պայմաններ:
Երևանի քաղաքապետ Տարոն Մարգարյանը ՀՀ առաջին տիկին Ռիտա Սարգսյանի հետ միասին շրջել է մանկապարտեզում, ծանոթացել կատարված աշխատանքներին, զրուցել փոքրիկների հետ: Պատասխանատուները նշել են, որ ծրագրի իրականացման արդյունքում սաների կրթության ու դաստիարակության համար ստեղծվել են անհրաժեշտ բոլոր պայմանները: Մոտեցումը յուրովի է նաև մանկապարտեզի ներքին հարդարման ու ձևավորման հարցում, արվել է հնարավորը, որպեսզի երեխաներն իրենց զգան ջերմ միջավայրում:

Person Image
20.12.2017

Երևանի հ. 91 մանկապարտեզը հիմնանորոգումից հետո իր դռներն է բացել շուրջ 230 սաների առջև

Երևանի քաղաքապետ Տարոն Մարգարյանը ՀՀ առաջին տիկին Ռիտա Սարգսյանի հետ ներկա է գտնվել Երևանի հ. 91 մանկապարտեզի վերաբացմանը: Ի դեպ, մանկապարտեզն այսուհետ կկրի «Փոքրիկ երկիր» անվանումը:

Ավելի քան 40 տարվա պատմություն ունեցող և կառուցման օրից երբևէ չհիմնանորոգված նախակրթարանում շուրջ 230 սաների համար ստեղծվել են նոր ու առավել հարմարավետ պայմաններ: 
Մանկապարտեզի հանդիսավոր բացման պատիվը վերապահվել է Երևանի քաղաքապետ Տարոն Մարգարյանին և ՀՀ առաջին տիկին Ռիտա Սարգսյանին: 
Նախակրթարանի ներքին հարդարման ու ձևավորման աշխատանքներն իրականացվել են յուրօրինակ լուծումներով՝ երեխաների համար ստեղծելով հեքիաթային ու նոր աշխարհ: Մանկապարտեզի բակը ևս բարեկարգվել է, տեղադրվել են մանկական խաղեր, զրուցարան-տաղավարններ: Հիմնանորոգման ծրագիրն իրականացվել է ՀՀ առաջին տիկնոջ աջակցությամբ՝ «Լույս» և «Բիայնա» բարեգործական հիմնադրամների ֆինանսավորմամբ: Երևանի քաղաքապետարանի աջակցությամբ էլ անհրաժեշտ նոր գույքով կահավորվել են խմբասենյակները, խոհանոցը, դահլիճներն ու մյուս սենյակները: 
Քաղաքապետ Տարոն Մարգարյանը ՀՀ առաջին տիկին Ռիտա Սարգսյանի հետ շրջել է մանկապարտեզում, ծանոթացել կատարված աշխատանքներին, զրուցել փոքրիկների հետ: 
«Յուրաքանչյուր մանկապարտեզ իր յուրահատուկ մոտեցումն ունի երեխաների կրթության, դաստիարակության հարցում, սակայն մեզ համար կարևոր են նաև այն պայմանները, որոնք ստեղծվում են երեխաների և աշխատակազմերի համար: Այս տարի սա արդեն 2-րդ մանկապարտեզն է, որը ՀՀ առաջին տիկնոջ աջակցությամբ հանձնում ենք մեր փոքրիկ համաքաղաքացներին՝ հնարավորություն տալով նրանց հաճախելու օրինակելի մանկապարտեզ: Երևանի քաղաքապետարանն իր հերթին առաջիկա հինգ տարիներին շարունակելու է մանկապարտեզների նորոգման ծրագիրը, որպեսզի մայրաքաղաքի բոլոր մանկապարտեզներն ունենան նմանատիպ պայմաններ», - ընդգծել է քաղաքապետ Տարոն Մարգարյանը:

Person Image
14.12.2017

Երևանի հ. 160 մանկապարտեզը հիմնանորոգումից հետո իր դռներն է բացել ավելի քան 160 սաների առջև

Երևանի քաղաքապետ Տարոն Մարգարյանը ՄԱԿ-ի մշտական համակարգող և ՄԱԶԾ մշտական ներկայացուցչի պաշտոնակատար Դմիտրի Մարիյասինի հետ միասին ներկա է գտնվել Քանաքեռ-Զեյթուն վարչական շրջանի թիվ 160 մանկապարտեզի վերաբացման հանդիսավոր արարողությանը: Հիմնանորոգումից հետո շուրջ 50 տարվա պատմություն ունեցող նախակրթարանը բոլորովին նոր հարմարություններով է իր դռները բացել ավելի քան 160 սաների առջև: Երևանի քաղաքապետարանի և ՄԱԶԾ համատեղ ֆինանսավորմամբ՝ ՄԱԿ-ի «Շենքերի էներգաարդյունավետ արդիականացմանն ուղղված ներդրումների ռիսկերի նվազեցում» ծրագրի շրջանակում հիմնանորոգված մանկապարտեզում հարմարավետ պայմանների ապահովմանը զուգահեռ կիրառվել են էներգաարդյունավետ լուծումներ: Քաղաքապետ Տարոն Մարգարյանը շրջել է մանկապարտեզում, ծանոթացել իրականացված աշխատանքներին, երեխաների կրթության և դաստիարակության համար ստեղծված պայմաններին, զրուցել փոքրիկների հետ: Պատասխանատուները նշել են, որ հիմնանորոգումից հետո մանկապարտեզում զգալիորեն կկրճատվեն գազի ու էլեկտրաէներգիայի հետ կապված ծախսերը: Շնորհիվ լիովին արդիականացված ու ջերմամեկուսացված տանիքի, նոր ջեռուցիչների, ինչպես նաև էներգաարդյունավետ լուսավորության համակարգի ներդրման, մանկապարտեզի լուսավորության ու ջեռուցման դիմաց վճարվող գումարները կկրճատվեն շուրջ 50 տոկոսով: Առիթն օգտագործելով` նախակրթարանի տնօրեն Սոնա Շամախյանը Երևանի քաղաքապետին է փոխանցել մանկապարտեզ հաճախող երեխաների ծնողների գոհունակությունն ու աշխատակիցների շնորհակալությունը՝ նախակրթարանների հանդեպ ցուցաբերվող մշտական ուշադրության և հոգածության համար: Քաղաքապետ Տարոն Մարգարյանն էլ իր հերթին մեկ անգամ ևս վստահեցրել է, որ հետևողականորեն կյանքի կոչվող ծրագրերն ունենալու են շարունակություն և հարմարավետ պայմաններ են ապահովվելու Երևանի բոլոր մանկապարտեզներում: 

Պատասխանելով լրագրողների հարցերին` քաղաքապետ Տարոն Մարգարյանը, առանձնակի կարևորելով ՄԱԿ-ի զարգացման ծրագրերի հայաստանյան գրասենյակի հետ համատեղ իրականացվող ծրագրերը, մեկ անգամ ևս ընդգծել է, որ քաղաքապետարանը բաց և պատրաստակամ է համագործակցության համար: Երևանի քաղաքապետը շնորհակալություն է հայտնել բոլոր այն գործընկերներին, ովքեր մեծ սիրով են միացել և միանում քաղաքապետարանի ծրագրերին և իրենց լուման են ներդնում Երևանն ավելի բարեկարգ, գեղեցիկ և հարմարավետ դարձնելու գործում:

Person Image
06.12.2017

Երևանի հ. 70 մանկապարտեզը հիմնանորոգումից հետո իր դռներն է բացել շուրջ 200 սաների առջև

Երևանի քաղաքապետ Տարոն Մարգարյանը ՀՀ առաջին տիկին Ռիտա Սարգսյանի հետ միասին ներկա է գտնվել Երևանի հ. 70 մանկապարտեզի վերաբացման արարողությանը, որն այսուհետ կկրի «Լապտերիկ» անվանումը: Շուրջ 30 տարվա պատմություն ունեցող նախակրթարանը երբևէ հիմնանորոգման չէր ենթարկվել և այսօր բոլորովին նոր հարմարություններով է իր դռները բացում շուրջ 200 փոքրիկների առջև: Մանկապարտեզի սաներն իրենց երաժշտական կատարումով յուրօրինակ շնորհակալություն են հայտնել բոլոր այն մարդկանց, ովքեր ներդրում են ունեցել նախակրթարանի հիմնանորոգման գործում: Մանկապարտեզի հանդիսավոր բացման պատիվը վերապահվել է Երևանի քաղաքապետ Տարոն Մարգարյանին և ՀՀ առաջին տիկին Ռիտա Սարգսյանին: 

Նախակրթարանի հիմնանորոգման ծրագիրն իրականացվել է ՀՀ առաջին տիկին Ռիտա Սարգսյանի աջակցությամբ՝ «Լույս» և «Բիայնա» բարեգործական հիմնադրամների ֆինանսավորմամբ: Երևանի քաղաքապետարանի աջակցությամբ էլ անհրաժեշտ նոր գույքով են կահավորվել խմբասենյակները, խոհանոցը, դահլիճներն ու աշխատանքային մյուս սենյակները: Մանկապարտեզի բակը նույնպես բարեկարգվել և կահավորվել է մանկական ժամանակակից խաղերով: 
Երևանի քաղաքապետ Տարոն Մարգարյանը ՀՀ առաջին տիկին Ռիտա Սարգսյանի հետ միասին շրջել է մանկապարտեզում, ծանոթացել կատարված աշխատանքներին, զրուցել փոքրիկների հետ: Պատասխանատուները նշել են, որ ծրագրի շրջանակում սաների կրթության ու դաստիարակության համար ստեղծվել են անհրաժեշտ բոլոր պայմանները: Մոտեցումը յուրովի է նաև մանկապարտեզի ներքին հարդարման ու ձևավորման հարցում, արվել է հնարավորը, որպեսզի երեխաներն իրենց զգան հեքիաթային միջավայրում: