ՆՈՐՈՒԹՅՈՒՆՆԵՐ
Person Image
01.11.2017

Երևանի հ. 26 մանկապարտեզը հիմնանորոգումից հետո իր դռներն է բացել ավելի քան 110 սաների առջև

Քաղաքապետ Տարոն Մարգարյանը ներկա է գտնվել Երևանի հ. 26 մանկապարտեզի վերաբացման հանդիսավոր արարողությանը: Երևանի քաղաքապետարանի տարեկան ծրագրով հիմնանորոգված նախակրթարանն իր դռներն է բացել ավելի քան 110 փոքրիկների առջև: Մանկապարտեզի բացման պատիվը վերապահվել է քաղաքապետ Տարոն Մարգարյանին և տնօրեն Նադեժդա Բաղրամյանին: 

Արաբկիր վարչական շրջանի ղեկավարի ուղեկցությամբ քաղաքապետ Տարոն Մարգարյանը շրջել է խմբասենյակներում, ծանոթացել կատարված աշխատանքներին ու փոքրիկների կրթության և դաստիարակության համար ստեղծված պայմաններին: Օգտվելով առիթից՝ մանկապարտեզի տնօրենը շնորհակալություն է հայտնել Երևանի քաղաքապետին ցուցաբերվող մշտական ուշադրության ու հոգածության համար, ընդգծելով, որ վերջին տարիներին նախակրթարանների պայմանների բարելավմանն ուղղված ծրագրերն իսկապես բազմաբնույթ են ու ծավալուն:

Քաղաքապետ Տարոն Մարգարյանն էլ իր հերթին վստահեցրել է, որ մանկապարտեզներում իրականացվող հիմնանորոգման ու անհրաժեշտ գույքով ապահովման ծրագրերը լինելու են շարունակական: 
Հարկ է նշել, որ ավելի քան 50 տարվա պատմություն ունեցող այս կրթօջախն ստեղծման օրից ի վեր երբևէ հիմնանորոգման չէր ենթարկվել:

Person Image
05.10.2017

Քաղաքապետ Տարոն Մարգարյանը հյուրընկալել է կրթական ոլորտի ներկայացուցիչներին

Երևանի քաղաքապետ Տարոն Մարգարյանն Ուսուցչի օրվա առթիվ քաղաքապետարանում հյուրընկալել է մայրաքաղաքի հիմնական, ավագ, միջնակարգ դպրոցների ու մասնավոր կրթօջախների, ինչպես նաև նախադպրոցական ուսումնական հաստատությունների մանկավարժներին: 

Շնորհավորելով ներկաներին մասնագիտական տոնի առթիվ` Երևանի քաղաքապետը շնորհակալություն է հայտնել մանկավարժներին նվիրված ու սրտացավ աշխատանքի համար, նկատելով, որ վերջիններիս ամենօրյա աշխատանքից է մեծապես կախված եկող սերնդի հայեցի դաստիարակությունն ու հետևաբար` մեր երկրի ապագան: Քաղաքապետ Տարոն Մարգարյանը մեկ անգամ ևս վստահեցրել է, որ Երևանի քաղաքապետարանը շարունակելու է հետևողական աշխատանքներ տանել ոլորտում դեռևս առկա խնդիրների լուծման ու մայրաքաղաքի կրթամշակութային օջախներում հարմարավետ պայմանների ապահովման ուղղությամբ: 
Մասնագիտական տոնի առիթով կազմակերպված ընդունելության շրջանակում երեխաների կրթության և դաստիարակության գործում ունեցած վաստակի և մասնագիտական անձնվեր գործունեության համար կրթական համակարգի մի խումբ աշխատակիցներ պարգևատրվել են Երևանի քաղաքապետի պատվոգրերով:

Person Image
22.06.2017

Մանկապարտեզն ավարտող երեխաները ստանում են դպրոցական առաջին նվերները

Երևանի քաղաքապետ Տարոն Մարգարյանի նախաձեռնությամբ շարունակվում է քաղաքապետարանի ենթակայության մանկապարտեզներն ավարտող երեխաներին դպրոցական պայուսակներով և գրենական պիտույքներով ապահովելու՝ արդեն ավանդույթ դարձած ծրագիրը: Այն մեկնարկել է հունիսի 15-ին և կտևի մինչև հունիսի 30-ը: Դպրոցական առաջին նվերները երեխաներն ստանում են մանկապարտեզի ավարտական հանդեսների ժամանակ, որոնցից մի քանիսին ներկա է գտնվել և փոքրիկներին բարեմաղթանքի խոսքեր է հղել նաև Երևանի քաղաքապետարանի հանրակրթության վարչության պետ Աննա Ստեփանյանը: Շնորհակալություն հայտնելով մանկապարտեզի տնօրեններին և մանկավարժներին՝ քրտնաջան աշխատանքի համար, Աննա Ստեփանյանը կարևորել է երեխաների կրթության հանդեպ ուշադրությունն ու հետևողական վերաբերմունքը:

«Վստահ եղեք, որ մայրաքաղաքի նախակրթարանները Երևանի քաղաքապետարանի և անձամբ քաղաքապետ Տարոն Մարգարյանի մշտական ուշադրության կենտրոնում են և համոզված եմ, որ այդ ուշադրության արդյունքը բոլորիդ է տեսանելի: Հուսով եմ, որ մեր այս փոքրիկները, ովքեր վաղն արդեն դպրոց կգնան, շատ լավ կսովորեն ու կավելացնեն գիտելիքների այն պաշարը, որը ստացել են մանկապարտեզներում»,- նշել է Աննա Ստեփանյանը:
Հիշեցնենք, որ այս տարի ևս մանկապարտեզն ավարտող երեխաներին տրմադրվում են շուրջ 10000 պայուսակներ՝ 16 անուն դպրոցական պարագաներով:

Person Image
01.06.2017

Հունիսի 1-ը՝ Ավ. Իսահակյանի անվան կենտրոնական գրադարանում

Երեխաների պաշտպանության միջազգային օրվա առթիվ Երևանի քաղաքապետարանի նախաձեռնությամբ կազմակերպված միջոցառումների շրջանակում Ավետիք Իսահակյանի անվան կենտրոնական գրադարանում հյուրընկալվել են «Հավատ» վատ լսող երեխաների մայրերի հասարակական կազմակերպության շահառու երեխաները: 

Գրադարանում երեխաները նախ շրջել և ծանոթացել են գրադարանային առօրյային ու գրքերի յուրօրինակ աշխարհին, ապա մասնակցել հեքիաթների վերաբերյալ խաղ-մրցույթների, ինչպես նաև դիտել մուտլֆիլմեր: Երեխաների հետ հանդիպմանը ներկա Երևանի քաղաքապետի տեղակալ Արամ Սուքիասյանը շնորհավորել է փոքրիկներին, շփվել նրանց հետ և առիթն օգտագործելով նշել է, որ այս տարի մայրաքաղաքի գրադարանները համալրվել են բազմաթիվ նոր ու հետաքրքիր մանկական գրականությամբ, այդ թվում` հեքիաթների գրքերով: Արամ Սուքիասյանը նաև ընդգծել է, որ հատուկ հոգածության կարիք ունեցող երեխաներն ու նրանց ընտանիքները մշտապես Երևանի քաղաքապետարանի ուշադրության կենտրոնում են:
Երեխաների ծնողները շնորհակալություն են հայտնել Երևանի քաղաքապետարանին հաշմանդամություն ունեցող երեխաների նկատմամբ առանձնահատուկ ուշադրության և հոգածության համար:
Միջոցառման ավարտին բոլոր երեխաները Երևանի քաղաքապետարանի կողմից նվերներ են ստացել:

Person Image
01.06.2017

Հունիսմեկյան միջոցառումները մեկնարկել են «Առողջ Երևան» մարզամշակութային տոնահանդեսով

«Երևանյան ամառ 2017» եռամսյա միջոցառումների ծրագրում ներառված, Երեխաների պաշտպանության միջազգային օրվան նվիրված հունիսմեկյան միջոցառումների շարքը մեկնարկել է Երևանի մանկական զբոսայգում կայացած «Առողջ Երևան» մարզամշակութային տոնահանդեսով: Երևանի քաղաքապետարանի աշխատակազմի սպորտի և երիտասարդության հարցերի բաժնի կողմից, մայրաքաղաքի մանկապարտեզների սաների մասնակցությամբ ավանդաբար կազմակերպվող այս միջոցառման նպատակը երեխաների շրջանում առողջ ապրելակերպի խթանումն է: Մինչ տոնահանդեսը, բոլոր վարչական շրջաններից ներկայացված մանկապարտեզների միջև կայացած մրցույթի նախնական փուլում արդեն հայտնի էին դարձել եզրափակիչ դուրս եկած թիմերը: Ըստ այդմ, յուրաքանչյուր վարչական շրջանից մեկական մանկապարտեզ մասնակցում էր տոնահանդեսին, որի մրցութային ծրագրում նախատեսված էր փոխանցումավազք՝ փոքր դրոշի փոխանցումով, հեռացատկ տեղից՝ զույգ ոտքերի հրումով, կանգնած դիրքից ծանրացված գնդակի նետում և պարանի ձգում։

Տոնահանդեսի մասնակից բոլոր մանկապարտեզների թիմերը պարգևատրվել են պատվոգրերով, մրցանակներով, գնդակներով և մարզաշապիկներով։ Մանկական ու մարզական շոուն ավարտվել է մանկապարտեզների սաների համերգային ծրագրով։